Wednesday
2017-10-18
3:12 AM
به‌خێربێیت Guest
RSS
 
كۆشان.. سه‌كۆی هه‌مووان
سه‌ره‌كی بوون به‌ئه‌ندام چوونه‌ژووره‌وه
به‌شه‌كان

سه‌ره‌كی » 2009 » April » 12 » ته‌قدیسكردنى تێكست و كڵۆمدانى ده‌ركه‌كانى پرسیار
ته‌قدیسكردنى تێكست و كڵۆمدانى ده‌ركه‌كانى پرسیار
1:47 AM

  نووسینى: یوسف عیزه‌دین

 
 

له‌ساڵى 1654- دا  ئوسقوف (ئۆشه‌ر) ده‌رئه‌نجامى لێكۆڵینه‌وه‌و حیسابكردنى ته‌مه‌نى نه‌وه‌ یه‌ك له‌دوای یه‌كه‌كانى كتێبى پیرۆز، به‌یه‌قینه‌وه‌ رایگه‌یاند:" دنیا له‌لایه‌ن خوداوه‌نده‌وه‌ له‌ساڵى 4004- ى پ.ز دروستكراوه‌". دواتریش دكتۆر (جۆن لایتفوت) ى جێگرى ریكتۆرى زانكۆى كه‌مبیرج ئیزافه‌یه‌كى خسته‌سه‌ر بۆچوونه‌كه‌ى (ئۆشه‌ر)، به‌رِاى ئه‌و دنیا له‌سه‌عات نۆى به‌یانى 23- ى تشرینى یه‌كه‌مى ساڵى 4004- ى پ.ز دروستبووه‌. سه‌رچاوه‌ى سه‌ره‌كى یه‌قینى ئه‌و دوو زاته‌ش له‌وه‌ى خستیانه‌رِوو له‌یه‌قینبوونیان به‌زانیارى و به‌سه‌رهاته‌كانى نێو كتێبى پیرۆزه‌وه‌ هه‌ڵهێنجرابوو!؟

گه‌ر به‌شێوه‌یه‌كى ئه‌بستراكتانه‌ برِوانینه‌ ئه‌م نمونه‌یه‌ى سه‌ره‌وه‌ ده‌بینین پیرۆزكردنى ده‌ق و یه‌قین به‌وه‌ى له‌نێویدا هاتووه‌ چۆن ده‌ركه‌كانى پرسیار كڵۆم ده‌دا، به‌درێژایى سه‌رده‌مانێك له‌رۆژئاوا كتێبى پیرۆز ته‌نها تێكستێكى سه‌ره‌كى و باوه‌رِپێكراو بوو كه‌بتوانرێت له‌میانییه‌وه‌ برِوانرێته‌ دنیاو هه‌موو ئه‌وه‌ى كه‌هه‌یه‌، ته‌نها تێكستێك بوو كه‌باوه‌رِدارانى به‌ته‌سه‌وورى خۆیان به‌خوێندنه‌وه‌و فامكردنى توانیویانه‌ له‌نایه‌قینه‌وه‌ پآ بنێنه‌ دنیاى یه‌قینى ئه‌به‌دى و ئه‌زه‌لى؟!.

له‌كاتێكدا نایه‌قین بارگاوییه‌ به‌گومان و پرسیاره‌ ئه‌رگۆمێنته‌كان، به‌ڵام یه‌قین وه‌ستانه‌ له‌به‌رده‌م ده‌ركه‌ى داخراوى وه‌ڵامه‌ ره‌هاكان. باوه‌رِى مرۆڤ به‌تاك ره‌هه‌ندى و تاك سه‌نته‌رالیزمى هێزێك، توانى مرۆڤ بباته‌ ده‌ره‌وه‌ى بوونى پرسیاره‌ ئه‌رگۆمێنته‌كان و دایبماڵێت له‌هه‌ر پرسیارێك كه‌ده‌یگه‌رِێنێته‌وه‌ بۆ گومان له‌و سه‌نترالیزمه‌ هزرییه‌ سه‌پێنراوه‌. ته‌قدیسكردنى تێكست به‌شێكه‌ له‌پرۆسه‌یه‌كى به‌رفراوانى ته‌قدیسكردنى شتگه‌لێكى زۆرى داسه‌پاوى ده‌ره‌وى دنیاى پرسیاركردن.

نووسه‌رێكى وه‌ك(خوان گۆیتیسولو) سه‌باره‌ت به‌مردنى دیكتاتۆرێكى وه‌ك"فرانكۆ" ده‌ڵێت: ( باوكه‌ من چى بكه‌م به‌بآ تۆ، به‌درێژایى چل ساڵ منت به‌رِێوه‌بردو ئه‌و فیلم و كتێبانه‌ت بۆ هه‌ڵبژاردم كه‌ده‌توانم بیانبینم و بیانخوێنمه‌وه‌، پێت گوتم چۆن ده‌بێت ئاشقبم.. هه‌ر تۆ به‌ها مۆرِاڵییه‌كان و هه‌موو شته‌كانى تریشت پآ ناساندم ).

(خوان گۆیتیسولو) به‌شێوه‌یه‌كى ته‌نزئامێزانه‌ ده‌یه‌وێت گوزارشت له‌گواستنه‌وه‌ له‌دنیاى یه‌قینه‌وه‌ بۆ دنیاى نایه‌قین بكات، ئه‌و دنیایه‌ى كه‌هیچ شتێك تێیدا پیرۆز نییه‌و ده‌كرێت پرسیار له‌باره‌ى سه‌رجه‌م هه‌بووه‌كانییه‌وه‌ بكرێت؟!.

"ئه‌لیاس فه‌ركوح" ده‌ڵێت:( پرسیار ده‌كه‌م ئاخۆ هیچ داهێنانێكى مرۆڤ هه‌یه‌ پیرۆز بێت تا به‌ده‌ر بێت له‌به‌گژداچوونه‌وه‌ى ئه‌قڵى ره‌خنه‌گرانه‌؟! یان ئاخۆ هیچ پرسیارێكى ره‌خنه‌گرانه‌ هه‌بووه‌ كه‌مه‌به‌ستى كردنه‌وه‌ى فایله‌كان و لێكۆڵینه‌وه‌ بێت، له‌ده‌سپێكدا رووبه‌رِووى ره‌فزكردن نه‌بووبێته‌وه‌...ئه‌وانه‌ى بته‌كان ده‌پرستن و ئه‌وه‌ى كه‌پێشتر نووسراوه‌ ده‌یكه‌نه‌ موقه‌ده‌سات و نابێت به‌لایدا بچین، به‌م شێوه‌یه‌ش تێكسته‌كان ده‌كه‌نه‌ كۆته‌لڕ... ئایا ده‌كرێت له‌میانى رێزمانه‌وه‌ بۆیان، به‌لاى پێشه‌نگه‌كانى ئه‌ده‌بدا نه‌چین؟ ئه‌گه‌ر پێشه‌نگ بوون هۆكارێك بێت بۆ بێده‌نگ بوون و سكون و قسه‌نه‌كردن... ئه‌وه‌ ئێمه‌ نه‌فى پێشه‌نگ بوونى ئه‌وانمان كردووه‌و شوناسى ئه‌وه‌نمان ته‌زویر كردووه‌و له‌دنیاى داهێنان بردووماننه‌ته‌ ده‌ره‌وه‌".

ئه‌وه‌ى كه‌لێره‌دا مه‌به‌ستمانه‌ بیخه‌ینه‌رِوو سامناكى ئه‌و ته‌قدیسكردنه‌یه‌ سه‌باره‌ت به‌تێكست و خاوه‌نه‌كانى  كه‌ له‌ئه‌ده‌بیاتى كوردیدا ساڵانێكه‌ هه‌یه‌، كاتێك بیرو هزرێكى بارگاوى به‌یه‌قین تێكستێك به‌جوان و باش و...تاد..ى ده‌داته‌ قه‌ڵه‌م، گوتنى پێچه‌وانه‌ى ئه‌مه‌ش شه‌رِى  گه‌وره‌ى لێده‌خوڵقێت و كه‌سى بێژه‌ر یان نووسه‌ر رووبه‌رِووى دژایه‌تییه‌كى  زۆر گه‌وره‌ ده‌بێته‌وه‌.

وه‌ك نمونه‌یه‌ك ئاخۆ "نالى" و تێكسته‌كانى له‌ده‌ره‌وه‌ى هه‌ر ته‌قدیسكردنێك، ناكرێت چه‌ندین و راڤه‌ى بۆ بكرێت و هه‌ڵوێسته‌ له‌ئاست ئه‌و شیعرانه‌یدا بكرێت كه‌كه‌م یان هه‌ر هیچ له‌باره‌یانه‌وه‌ قسه‌نه‌كراوه‌، یان ئاخۆ واباشتر نییه‌ ئه‌و زاته‌ له‌نێو هاله‌ى ته‌قدیسكردندا نه‌كوژین و له‌ده‌ره‌وه‌ى ئه‌و دنیایه‌ى كه‌سانێك بۆ ئه‌ویان دروستكردووه‌ مامه‌ڵه‌ له‌گه‌لڕ تێكسته‌كانى بكه‌ین و رێگرێك نه‌بێت بۆ گوتنى ئه‌وه‌ى ده‌مانه‌وێت بیڵێین له‌باره‌یه‌وه‌و  گوتنى تێرِوانینێكى جیاواز سه‌باره‌تى نه‌بێته‌ مایه‌ى شه‌رِه‌جه‌نگێكى بێمانا كه‌هیچ ئیزافه‌یه‌ك ناخاته‌ سه‌ر خوێندنه‌وه‌ى ئێمه‌ بۆ تێكسته‌كانى. خستنه‌رِووى هه‌ر یه‌قینێكى پێشوه‌خت ده‌رحه‌ق به‌تێكستێك، به‌مه‌به‌ستى سرِكردنى ئیراده‌ى خوێنه‌ر و تێكشكاندنى تواناى برِیاردانى  له‌وه‌ى له‌نێو تێكستێكدا قه‌وله‌ بۆ خۆى بیبینێت، هه‌ڵسورِانه‌ له‌نێو جوغزى داخراوى میتافیزیكدا و هه‌وڵدانێكه‌ بۆ كڵۆمدانى ده‌ركه‌كانى پرسیار. تێرِوانینێكى بارگاوى به‌یه‌قین پێمان ده‌ڵێت، ئیبراهیم ئه‌و كه‌سه‌ موجازیفه‌یه‌ كه‌توانى بته‌كان تێكبشكێنێت و به‌وه‌ش پرسیارێك جێبهێڵیت سه‌باره‌ت به‌شه‌رعیه‌تى بوونیان و قودسییه‌تیان بسرِێته‌وه‌و ترس و سامى خه‌ڵك ده‌رحه‌ق به‌بته‌كان برِه‌وێنێته‌وه‌. ئه‌گه‌ر ئێمه‌ ئه‌وه‌نده‌ له‌باره‌ى ئیبراهیم- وه‌ بزانین و ئاوا به‌یه‌قینه‌وه‌ تێیبرِوانین ئه‌وه‌ كاره‌ساته‌!؟ ئه‌ى نابێت ئه‌وه‌ بهێنینه‌وه‌ یادى خۆمان كه‌به‌تێكشكاندنى بته‌كان شتێكى زۆر سامناكتر هاته‌ كایه‌وه‌، گه‌رچى نابێت ئه‌وه‌ش بكه‌ینه‌ یه‌قین و ده‌بێت وه‌ك نایه‌قینێك مامه‌ڵه‌ى له‌گه‌لڕ بكه‌ین و ده‌ركه‌كانى پرسیاركردن به‌ئاوه‌ڵایى بهێڵینه‌وه‌، به‌تایبه‌ت له‌زه‌مه‌نێكدا وه‌ك "ئیمبیرتۆ ئیكۆ" ئاماژه‌ى پێده‌دات:( ده‌سه‌ڵاتى هێزێكى پووچ و به‌تاڵى رووكه‌شیانه‌ى ریكلامه‌كان كۆمه‌لڕ له‌ده‌ورى پاشماوه‌ى زمان و هزر كۆده‌كاته‌وه‌، ئه‌وانه‌ى مودمینى قسه‌كردنن ئێمه‌ ده‌به‌نه‌ نێو جه‌هل و بێده‌سه‌ڵاتى و په‌راوێزه‌وه‌، ته‌نانه‌ت وادێته‌ پێش چاو ئه‌م زه‌مه‌نى تێكشكانه‌، تێكشكانى ئه‌وان نییه‌، به‌ڵكو تێكشكانى ئێمه‌یه‌).

ته‌قدیسكردنى هه‌ر تێكستێك هه‌وڵدانێكه‌ بۆ راگرتنى هه‌ر جۆره‌ بۆچوونێكى پێچه‌وانه‌و نه‌یار به‌و تێكسته‌ى كه‌ته‌قدیسكراوه‌، ته‌نها شتێك كه‌رِێگه‌ پێدراوه‌ سه‌باره‌ت به‌تێكستێكى ته‌قدیسكراو دروستكردنى زیاترى هاله‌و پێداهه‌ڵدان و مه‌زنكردنیه‌تى، به‌مه‌ش هۆشمه‌ندى ده‌بێته‌ تێكست و له‌ده‌ره‌وه‌ى ئه‌و تێكسته‌ بوونى نابێت و هه‌ر ئه‌و هۆشمه‌ندییه‌ به‌تێكست بووه‌ش ده‌كه‌وێته‌ دژایه‌تى هه‌ر تێكستێكى نه‌یار و ناته‌با و به‌رده‌وامیش له‌هه‌وڵى ئه‌وه‌دا ده‌بێت بیسه‌لمێنێت كه‌مه‌علوم لاى ئه‌وه‌و مه‌جهولێكیش نییه‌ خۆمانى پێوه‌ سه‌رقاڵبكه‌ین و بۆى بگه‌رِێین. كاتێك تێكست ده‌گاته‌ ئه‌و ده‌سه‌ڵاته‌ ره‌هایه‌ى كه‌ناهێڵیت پرسیار له‌باره‌ى قودسییه‌تییه‌وه‌ بكرێت، ئه‌و ده‌م بۆخۆى ده‌بێته‌ پانتاییه‌ك بۆ چه‌پاندن و ئینتیما، ئینتیما بۆ هه‌ر تێكستێك له‌هه‌ر ئان و زه‌مانێكدا گرفتێكى گه‌وره‌یه‌، له‌كاتێكدا ململانێى راسته‌قینه‌ى مێژوو هه‌رده‌م ململانێى ئینتیما بۆ تێكست یان بۆ زمان بووه‌، ته‌قدیسكردنى زمانیش به‌شێكى دیكه‌ى ته‌قدیسكردنى تێكسته‌، له‌كاتێكدا زمان بۆ خۆى ئه‌و نه‌زانراوه‌یه‌ كه‌ده‌بێت هه‌رده‌م بیناسین و خۆمان له‌نێویدا بناسینه‌وه‌و له‌گه‌لڕ زۆر بگره‌و به‌رده‌ى دیكه‌ش كه‌ده‌بێت په‌ى پێبه‌رین. میكانیزمه‌ى چۆنیه‌تى ته‌قدیسكردنى تێكسته‌ ئایینییه‌كان و تێسكته‌كانى تر له‌زۆر رووه‌وه‌ هاوشێوه‌ن و ئامانجى سه‌ره‌كیشیان به‌یه‌قین گه‌یاندنى ئێمه‌و برِینى شاده‌مارى پرسیاركردنمانه‌، له‌مابه‌ینى تێكسته‌ ته‌قدیسكراوه‌كاندا ئه‌گه‌ر پێكدادانێكیش هه‌بێت ئه‌وه‌ دژایه‌تییه‌ نه‌ك ململانآ، دژایه‌تى و ململانێش دوو چه‌مكى جیاوازن، له‌كاتێكدا ململانآ له‌پرسیاره‌وه‌ سه‌رچاوه‌ ده‌گرێت و زانستیى تره‌، ئه‌وه‌ دژایه‌تى به‌ده‌ر له‌دنیاى پرسیار پێكدادانێكه‌ به‌مه‌به‌ستى سرِینه‌وه‌و په‌راوێزكردنى ئه‌وى تر، ئه‌مه‌ له‌ئه‌ده‌بیاتى كوردیدا بۆته‌ ته‌نگژه‌یه‌كى به‌رچاو له‌ئاست هه‌نگاونان به‌ره‌و شتى نوێ، به‌شێوه‌یه‌كى گشتى هه‌رده‌م یه‌ك ره‌هه‌ند و یه‌ك ریتم له‌خوێندنه‌وه‌ بۆ ئه‌ده‌بیاتى كوردى وه‌ده‌رده‌كه‌وێت، جۆرێكه‌ له‌كاركردن له‌سه‌ر جیاكردنه‌وه‌ى ره‌نگه‌كان، نه‌ك رۆچوون بۆ نێو نادیارو نه‌زانراوه‌كانى ده‌ق. ده‌بینین قسه‌كردن له‌سه‌ر "نالى" ده‌گاته‌ زۆر شوێن، به‌ڵام ناگاته‌ خوێندنه‌وه‌ى ئه‌و شیعره‌ى كه‌له‌زمانى ئاژه‌ڵێكه‌وه‌ خۆى و ئه‌و به‌یه‌ك ده‌شوبهێنێت، "نالى" ده‌ڵێت:

( هێنده‌ پێم خۆش بوو زمانى حاڵى ده‌یگوت"نالى"یا!

هه‌ردوو حه‌یوانین ئه‌تۆ گوێكورت ئه‌منیش گوێدرێژ ).

یان كه‌ده‌ڵێت:

( "نالى" كه‌وا سه‌گه‌، سه‌گى ئه‌و مه‌رز و بوومه‌یه‌

ئه‌مما سه‌گى موعه‌لله‌مى بآ ده‌نگ و بآ وه‌رِه‌ ).

ئێمه‌ سه‌ربارى ئه‌و دنیا ماته‌ریالیست و ته‌كنۆ كلتووره‌ى له‌ده‌ره‌وه‌ماندا بوونى هه‌یه‌، هێشتاكه‌ له‌پشت دیواره‌ به‌رز و كۆنینه‌كانى میتافیزیكه‌وه‌ به‌یه‌قینه‌وه‌ ده‌رِوانینه‌ دنیا و سه‌رجه‌م دیارده‌كان، بآ هیچ گومان و پرسیارێك تێكسته‌كان واقبوولڕ ده‌كه‌ین كه‌پێشوه‌خت پێمان ده‌گوترێت، ئه‌م ده‌رده‌ كوشنده‌یه‌ باڵى به‌سه‌ر به‌شێكى زۆرى رووناكبیریى كوریدا كێشاوه‌، "ئه‌دۆرنۆ" ده‌ڵێت:( هیگلڕ له‌سه‌ر حه‌ق بوو، كاتێك گوتى رووناكبیر كه‌سێكه‌ خاوه‌ن هۆشمه‌ندیى مرۆڤێكى سه‌ركێش و سه‌ره‌رِۆیه‌، چونكه‌ نووسین به‌گژداچوونه‌وه‌ى سیسته‌مه‌). ده‌بێت نووسین بۆخۆى ده‌رچوون و تێپه‌رِكردنى سیسته‌مه‌كان بێت و له‌ئاستێكدا رانه‌گیرێت و ته‌قدیسنه‌كرێت و نه‌كرێته‌ ده‌سه‌ڵاتێكى ترسناك بۆ سه‌ركوتكردن و ئه‌شكه‌نجه‌دانى رۆحى، ئه‌گه‌ر نووسین بۆخۆى گه‌مه‌یه‌ك بێت، ئه‌وه‌ ناكرێت ئه‌و گه‌مه‌یه‌ له‌قاڵبده‌ین و له‌ئاستێكدا بیمرێنین، چونكه‌ ئه‌گه‌ر به‌شێك یان بنه‌مایه‌كى ئه‌و گه‌مه‌یه‌ خستنه‌رِووى جیاوازییه‌كان بێت، ئه‌وه‌ ناكرێت له‌ده‌ره‌وه‌ى جیاوازییه‌كانه‌وه‌ تێى برِوانین، به‌رِاى "باختین" نووسین پێكه‌نینه‌، به‌ڵام لاى ئێمه‌ نووسین ئه‌گه‌ر بۆخۆى پێكه‌نینیش بێت، ئه‌وه‌ ده‌كرێته‌ گریان بۆشته‌كان، ده‌كرێته‌ ده‌نگێكى توورِه‌ دژ به‌وانه‌ى ئه‌ویان قبووڵ نییه‌، ده‌كرێته‌ كرده‌یه‌كى ره‌ها و له‌نێو زاراوه‌كانى جوانى و داهێنان و زۆر گرنگ و نه‌كراوه‌و نه‌بووه‌و...تاد..ده‌كرێته‌ كۆته‌ڵێكى هاوشێوه‌ى ئه‌و كۆته‌ڵانه‌ى كه‌ له‌ده‌وریان كه‌سانێك مۆمه‌كان داده‌گیرسێنن، ده‌كرێته‌ ئه‌و ئه‌فسانه‌یه‌یه‌ى كه‌ناشێت بڵێین بۆ؟.. چۆن؟.. كه‌ى؟.. و سه‌رجه‌م پرسیاره‌كانى تریش قه‌ده‌غه‌ن و به‌كردنیان به‌ر نه‌فره‌تى باوه‌رِدارانى تێكسته‌ ته‌قدیسكراوه‌كه‌ ده‌كه‌وین. فه‌لسه‌فه‌و لۆژیكى میتافیزیك خۆى له‌دوو توێى سێنترالیزم و گوتارى باڵاو ته‌قدیسكردندا نمایش ده‌كات، به‌په‌راوێزكردنى سه‌رجه‌م ئه‌وه‌ى له‌گه‌ڵیدا نه‌یاره‌ خۆى ده‌سه‌پێنێت، ئاخۆ هه‌ر ئه‌م ئه‌قڵیه‌ته‌ش نییه‌ له‌بوارى مه‌عریفى و فیكرى و ئه‌ده‌بیى و سه‌رجه‌م بواره‌كانى دیكه‌ى كورددا كار ده‌كات، وه‌رگرتنى بیر و هزره‌ دژه‌كانى میتافیزیكیش له‌لایه‌ن كه‌سانێكه‌وه‌و به‌كاربردنى له‌خوێندنه‌وه‌و نووسینه‌ ره‌خنه‌ییه‌كانیاندا بۆ ئه‌وه‌ نییه‌ ته‌جاوزى ئه‌و دیدگه‌ میتافیزیكییه‌ بكه‌ن، به‌ڵكو جارێكى تر كار بۆ به‌رجه‌سته‌كردن و سه‌پاندنى دیدگه‌ى خۆیان ده‌كه‌ن، به‌چه‌شنێك كه‌له‌چوارچێوه‌ى میتافیزیك ناچێته‌ ده‌ر و شته‌ جیاواز و له‌یه‌كنه‌چووه‌كانى له‌گه‌لڕ خۆى، پآ قبووڵ نییه‌ و له‌هه‌وڵى دروستكردنى لۆگۆسێنترالیزمدایه‌، ئه‌گه‌ر دیدگه‌ میتافیزیكییه‌كان كار بۆ خستنه‌پێشى ئاخافتن بكه‌ن به‌به‌راورد له‌گه‌ڵ تێكستى نووسراو، هه‌روه‌ك چۆن وه‌عز و وتار و بانگهێشته‌ ئایینییه‌كان و ترساندن و تۆقاندن ده‌كه‌ونه‌ پێش تێكسته‌ نووسراوه‌ ئایینییه‌كه‌و خوێندنه‌وه‌ى، ئه‌وه‌ به‌شێوه‌یه‌كى گشتى ئه‌قڵیه‌تى خوێندنه‌وه‌و ره‌خنه‌ى كوردیش هه‌مان پرۆسه‌ پیاده‌ده‌كات، گه‌رچى ئه‌وه‌ى كه‌ده‌یه‌وێت به‌نووسینیش ده‌ریبرِێت، به‌ڵام له‌راِستیدا ئه‌و چه‌شنه‌ نووسینانه‌ ته‌جاوزى زمانى ئاخافتن و گێرِانه‌وه‌كانى نه‌كردووه‌، ئه‌و ته‌رزه‌ ئیشكردنانه‌ به‌هه‌مان ریتم له‌لێدانى پێشووتر دێته‌ سه‌ر باس و خواسى مه‌زنێتى و جوانى تێكستێك، به‌ڵام ئه‌مه‌ چۆن و بۆچى و ده‌یان پرسیارى تر بآ وه‌ڵام جآ ده‌هێڵن، گرنگ ئه‌وه‌یه‌ به‌لایانه‌وه‌ تێكستێك یان چه‌ند تێكستێك ببه‌نه‌ پێش تێكسته‌كانى ترو بڵێن له‌ده‌ره‌وه‌ى ئه‌مانه‌ شتێكى جدى و جوان به‌دیناكرێت، ئه‌مانه‌ هه‌مووى گوته‌زا سه‌تحییه‌كانى  ئاخافتنن كه‌له‌نووسیندا به‌كاریده‌هێنن، به‌زاڵكردنى ئاخافتنیش به‌سه‌ر نووسیندا فۆنۆسێنترالیزم به‌رقه‌راده‌كرآ، له‌كاتێكدا ئه‌میش ره‌گه‌زێكى لۆگۆسێنترالیزمه‌. له‌راِستیدا هیچ سه‌رچاوه‌یه‌كى ره‌ها له‌ئارادا نییه‌، تا له‌میانى ئه‌وه‌وه‌ بسه‌لمێنرێت كامه‌ تێكست باشه‌ و كامه‌ خراپ، دیاره‌ هیچیش له‌م جۆره‌ پێناسه‌كردنانه‌دا شین نابێت، جگه‌ له‌دروستكردنى تێكستێكى ته‌قدیسكراو، جا ئه‌گه‌ر ده‌سه‌ڵاتێكى له‌پشت بێت، ئه‌وه‌ وه‌ك تێكسته‌ ته‌قدیسكراوه‌ ئاینییه‌كان به‌درێژایى زه‌مه‌نێك ده‌توانێت له‌نێو دنیاى ته‌قدیسكردندا بمێنێته‌وه‌و خۆى بپارێزێت.

ئه‌گه‌ر قسه‌ له‌سه‌ر كایه‌ ئه‌ده‌بى و فیكرى و مه‌عریفییه‌كانى كورد بكه‌ین، ده‌بێت ئه‌وه‌ بزانین هه‌ر یه‌قینێكى پێشوه‌خت به‌و كایانه‌و باوه‌رِهێنانمان پێى له‌رِووى باش و خراپى و هاوچه‌شنه‌كانى ئه‌و جۆره‌ پۆلێنكردنانه‌وه‌، هیچ سوودێكى نییه‌و بێجگه‌ له‌توێوه‌گلانمان و رۆچوونمان بۆ نێو خمخۆركى راوه‌ستان و خۆلێسانه‌وه‌ و راوحكردن و نه‌گه‌یشتنه‌ هیچ، هیچ ئاسۆیه‌كى دیكه‌ى نییه‌. زۆرێك له‌وه‌ى كه‌تائێستا له‌و كایانه‌دا كراوه‌و ده‌كرێت لێوانلێوه‌ له‌یه‌قین و پرسیارنه‌كردن و ته‌سلیمبوون و بگره‌ چه‌شنێك له‌په‌رستنى ئه‌وه‌ى كه‌هه‌یه‌، به‌ڵام ده‌بێت له‌خوێندنه‌وه‌ى په‌راوێزكراوه‌كانى ئه‌و بوارانه‌وه‌  هه‌وڵى هاتنه‌ ناوه‌وه‌ بده‌ین و ئه‌وداڵى نه‌زانراوه‌كان بین و به‌شته‌ له‌بیركراوه‌كاندا بچینه‌وه‌ و ده‌ركه‌كانى پرسیار ئاوه‌ڵابكه‌ین و سلڕ له‌وه‌ نه‌كه‌ینه‌وه‌ كه‌بڵێین ئێمه‌ یه‌قینێكمان نییه‌ به‌وه‌ى كه‌هه‌یه‌و هه‌وڵدانى ئێمه‌ش بۆ گه‌یشتنه‌ یه‌قین نییه‌، به‌ڵكو هه‌رده‌م وه‌ك كه‌شتییه‌كى بێله‌نگه‌ر ده‌مێنینه‌وه‌و دڵنیاشین كه‌یه‌قین درۆیه‌كى گه‌وره‌یه‌و بۆ تێكشكاندنى ئێمه‌یه‌ك هه‌یه‌ كه‌له‌م دنیایه‌دا سه‌ربارى لێسه‌ندنه‌وه‌ى زۆربه‌ى  مافه‌كانمان، داواى یه‌قینبوونیشمان لێده‌كرێت به‌و تێكست و شتانه‌ى كه‌ته‌قدیسكراون.     

 

بینراوه‌: 490 | زیادكراوه‌ له‌لایه‌ن: 2Koshan | پله‌دانان: 0.0/0 |
ژماره‌ی تێبینییه‌كان: 0
ته‌نها ئه‌ندامان ده‌توانن تێبینی بنووسن.
[ بوون به‌ئه‌ندام. خۆتۆماركردن | چوونه‌ژووره‌وه ]
شوێنی چوونه‌ژووره‌وه‌ی ئه‌ندامان

ڕۆژمێر و ئه‌رشیف
«  April 2009  »
SuMoTuWeThFrSa
   1234
567891011
12131415161718
19202122232425
2627282930

گه‌ڕان

هه‌ندێ پێگه‌ی تر

ئێستا

Total online: 1
Guests: 1
Users: 0


میوانانی سه‌رهێڵ

ژ. سه‌ردان له‌ 20 ی ئازاری 2009 ه‌وه‌
سه‌رجه‌م مافه‌كانی پارێزراوه‌ © 2017
Powered by uCoz